त्रिशूली–३ ‘ए’ सुरुङबाट १० दिनपछि उद्धार गरिएका कबीर सैनिक अस्पतालको आईसीयूमा

रसुवाको त्रिशूली–३ ‘ए’ जलविद्युत् आयोजनाको सुरुङबाट १० दिनपछि जीवितै उद्धार गरिएका कबीर महर्जनलाई छाउनीस्थित वीरेन्द्र सैनिक अस्पतालको आईसीयूमा भर्ना गरिएको छ।

घटनास्थलमा प्रारम्भिक उपचारपछि हेलिकोप्टरमार्फत काठमाडौं ल्याइएका कबीरले सुरुमा आफन्तलाई चिन्न सकेका थिएनन्। होसमा आएपछि उनले ‘म कहाँ छु, मलाई के भएको हो?’ भन्दै सोधेको उनकी श्रीमती हीराशोभाले बताएकी छन्।

१० दिनसम्म कबीरको पर्खाइमा रहेको परिवारले जीवितै उद्धारको खबर पाएपछि खुसीका आँसु झारेको जनाएको छ। परिवारले उद्धारमा खटिएका नेपाली सेना, चिकित्सक टोली र सहयोग गर्ने सबैप्रति धन्यवाद व्यक्त गरेको छ।